Við græðum - þú borgar. Ótrúlegur gróði Landsbankans - skilar sér ekki í buddu borgarans.

Ótrúleg afkoma Landsbankans vekur athygli - fjörutíuþúsundmilljónir. Já takk. En það sem vakti athygli mína var viðtalið við bankastjórann - þar var hann að vonum kokhraustur og sagðist geta horft framan í hvern sem er. Líklegast á hann þá við kollega sína úr banka og bissnessheimum.

En heldur sljákkaði þó í kalli þegar hann var spurður að því hvernig hinn almenni viðskiptamaður myndi finna fyrir þessu.... Á engan hátt - engar lækkanir - áfram gjöld og gjöld ofan.... en þjónustan batnar....

En líklega þýðir þetta betri þjónustu við hina efnameiri - þeir fá flottari jólagjafir og fleiri miða á leiki með West Ham - annað væri nú varla hægt.

Við hin stöndum á hliðarlínunni og fylgjumst með - stolt yfir því að taka þátt í þessum stórkostlega bisness - borgum okkar gjöld og hvetjum West Ham.

Já - væri nú ekki ráð að lækka eithvað af þessum gjöldum - og t.d. að afnema fit kostnaðinn......

Athugasemdir

[Guðrún Magnea Helgadóttir, 28.1.2008 kl. 20:51]

Gróðinn er úr buddum landans...Spurðu þá sem eynt hafa!

[Jóna Kolbrún Garðarsdóttir, 29.1.2008 kl. 01:12]

Svínarí, segi ég hinn almenni viðskiptavinur borgar brúsann eins og alltaf

[Kári Harðarson, 29.1.2008 kl. 10:49]

Pabbi var vanur að segja "Why does a dog lick it's balls?  Because it can!"

Það er ekki þeirra að lækka gjöldin heldur okkar að berjast fyrir lægri gjöldum.

[Gullvagninn (IP-tala skráð) 29.1.2008 kl. 14:22]

Ömurlegt ástand, ekki meiri einkavæðingu, og alls ekki auðlindinar okkar!

[Theódór Norðkvist, 29.1.2008 kl. 15:01]

Tek undir með Kára. Er það ekki okkar að sýna blóðsugunum að þeir komast ekki endalaust upp með sogið?

[Þorleifur Ágústsson, 29.1.2008 kl. 16:06]

Takk fyrir allar athugasemdir. Auðvitað er LÍ og hinir bankarnir reknir sem fyrirtæki. En á sína vísu eru þeir með sama kerfi - sömu vexti og gjöld. Sumt geta þeir lagað - annað ekki. Hitt er svo spurning og hún er sú: Ef að þessum bönkum gengur svona gríðarlega vel - skila slíkum árangri - því lækka þeir þá ekki útlánsvexti og yfirdráttarvexti? - Ég spyr - þurfa vextir á yfirdráttarlánum eða öðrum lánum yfir höfðu að vera svona háir?

Hafa bankarnir ekkert svigrúm til að gera vel við sitt fólk....eða skiptum við engu máli?!

[Theódór Norðkvist, 29.1.2008 kl. 16:31]

Þorleifur þú átt heiður skilið fyrir að fjalla um þetta.

[Sigurður Viktor Úlfarsson, 29.1.2008 kl. 17:04]

Ef þú ert óánægður með kjörin í bankanum þínum þá ferð þú einfaldlega í annan banka þar sem þú færð betri kjör.  Þú gætir meira að segja flutt viðskipti þín erlendis ef þú vildir.

Mundu að það er þitt val að versla við bankann þinn.  Það biður þig enginn um það.

[Þorleifur Ágústsson, 29.1.2008 kl. 19:19]

Sæll Sigurður- jújú, það er hægt að flytja í annað þorp ef manni líður ílla heima hjá sér. Og það er hægt að geyma peninginn undir koddanum...allskonar möguleikar.

En það er bara ekki það sem ég er að fjalla um - ég er að spá almennt í stöðu þessara banka - LÍ skilaði bara svo miklum hagnaði að ég nefni þann banka. Svo að ég verð því miður að blása á þessi rök þín.

Ég er að spyrja: Ef framlegð t.d. LÍ er 27% - hví eru þá vextirnir af peningum fólks í bankanum ekki þeir sömu.... er bankinn ekki að ávaxta fé almennings??

[unglingur, 29.1.2008 kl. 20:04]

Yfirdráttarvextirnir eru að langmestu háðir stýrivöxtum Seðlabankans. Stýrivextir Seðlabankans eru háðir eftirspurn / verðbólgu í hagkerfinu. Eftirspurn/verðbólga í hagkerfinu er háð m.a. eyðslu almennings. Mikil eyðsla (neysla) almennings => háir vextir. Ekki mjög flókin hagfræði í því...

Það sem mér finnst skemmtilegast í þessu er hvað Íslendingar líta á yfirdráttarlán sem sjálfsagðan hlut. Þegar þau byrjuðu voru þau hugsuð sem skammtíma redding sem þau eiga að vera. Nú eru allir landsmenn (18 ára og eldri) með einhvern 250þús kall á yfirdrætti. Hvaða skynsemi er í því?

Ég get ekki að því gert þótt ég kunni vaxtareikning en þið ekki... 

[Þorleifur Ágústsson, 29.1.2008 kl. 20:34]

Jæja ágæti "unglingur"- af einhverju ástæðum þorir þú ekki að skrifa undir nafni - en þú kemur einhver tíma "út úr skápnum" og þá verður þetta allt í lagi og þú treystir þér til að skrifa undir nafni. Þú ert ekki einn - ég lofa.....

En þú segir nokkuð - gera stýrivextir seðlabankans (sem reyndar eru fáránlega háir) bönkunum svo erfitt fyrir að þeir kjósa að leyfa kúnnum sínum að njóta ávaxtanna af hárri framlegð. Hm.... þetta er reiknikúnst sem ég því miður kann ekki. 

Nje, svarið við mínum spurningum er ekki að finna í jöfnunni þinni. Og því verður þú að bíða eftir næsta kaffitíma til að ræða þetta við hina strákana.

Við hin spáum áfram í mögulega "sanngirni" í lífinu.