Stærðin skiptir máli - svindl og svínarí segir rödd sannleika og réttlætis á sunnanverðum Vestfjörðum.

Mikið var fundað í síðustu viku á Ísafirði - saman voru komnir karlar og konur sem áttu það sammerkt að hafa áhuga á þorski. Þetta voru gestir frá ýmsum löndum  - Skotlandi - Hjaltlandseyjum - Noregi og Svíþjóð. Já og Akureyri.

Og auðvitað skartaði Vestfirsk náttúra sínu fegursta - norðan kaldi - kvöldsól og fuglalíf. Og niðurstöðurnar eru góðar og lofa góðu. En auðvitað eru þeir sem alltaf blanda kvótamálum inn í þetta - líkt og vísindanefndin sem gaf þessu verkefni háa einkun og ákvað að styrkja það um 1 milljón evrur hafi áhuga á kvótaumræðu á Íslandi - nei, vísindin eru langt yfir það þras hafin. Þorskurinn vex óháð því hvort kvótinn er eða ekki - bara ef hann fær kjöraðstæður - og það er einmitt það sem við erum að gera - skapa aðstæður sem fá fiskinn til að vaxa vel - nýta fóðrið vel og enda svo sem hágæða var á diskum neytenda. Ekkert meira um það að segja. En auðvitað finnst mér hundleiðinlegt að Vestfirðingar skuli nota tækifærið og ata þessar rannsóknir auri - segja að um svindl og þaðan að verra sé að ræða (http://nilli.blog.is/blog/nilli/). Mér persónulega er sama - ég birti mínar niðurstöður í ritrýndum tímaritum - sem eru ritrýnd af til þess hæfum einstaklingum - ekki bloggurum á Suðurfjörðum

Já - maður tekur pusið í hnakkann - hér eru engin tæknilega mistök - allt gengur eins og í sögu - enda gamlir og margreyndir menn sem sjá um kvíarnar fyrir okkur - Barði og Beggi - Eiríkur og Halli - þeir fara létt með þetta - ekkert klúður þar. En að öllum öðrum ólöstuðum þá var það svo sannarlega gott fyrir þetta verkefni að fá Barða Ingibjarts í lið með okkur - sá kann til verka! Enda voru gestirnir frá útlöndum mjög impóneraðir af handbragði Barða og uppsetningu ljósabúnaðarins í sjókvíunum. Já gott fólk skiptir máli - og stærðin skiptir máli - þrátt fyrir mótbárur sunnan frá Tálknafirði. Stærðin skiptir máli

 

Athugasemdir

[Bjarni Kjartansson, 7.5.2007 kl. 12:42]

Segðu mér nú, hverjir frá Tálknafirði hafi uppi ásakanir í þinn garð minn kæri.

Svo er einnig, að á Tálknafirði var unnin grundvallarvinna í áframeldi á Þorski og það veist þú afar vel.

Magnús Guðmundsson, náttúrugaldramaður, fór fyrir þeirri vinnu.  Í stórum höndum hans leikur allt, ungviðið, smáfiskur og í raun allir íbúar náttúrunnar ,,Fyrir Vestan". 

Ég varð þeirri blessunar aðnjótandi, að kynnast honum, þá ég bjó þarna.  Magnús tekur mönnum hægt, sérílagi ef hann taldi sig eiga von á menntahroka.

Ég fluttist þangað sem kennari en vann hjá Magnúsi á kvöldin og um helgar.  Þá hét það að bjarga verðmætum.

Við Magnús vorum nú langt í frá sammála um Kvótamálið en hann treysti veiðimönnum að fara að öllum reglum og að þetta bætti meðferð, bæði hráefnisins og miðana.  Í það minnsta hafði ég réttara fyrir mér, hvað umgengnia um náttúruna varðaði og líklega hafði Magnús of haár hugmyndir um heiðarleika sinna kollega.

Allt með það er ég þess fullviss, að seint mun Magnús og hans fólk níða niður skóinn af þeim, sem vinna að hans áhugamálum og víst samgleðst hann þeim, sem nær árangri.

Menn Vestra eru vel að öllum þeim styrkjum til náttúrurannsókna og viðleitni til að skilja gerr þau lög sem gilda í  hinum harða heimi fæðukeðjunnar.

Þar skortir verulega á hjá Fiskifræðingum og þeim vísindameönnum, sem mestu ráða í ráðgjöf til stjórnvalda, því hefur farið sem farið hefur og auðn er víða, þar sem gróskumiklar breiður Kólalla voru áður fyrir fjörðum.  (Patreksflóinn utanverður. ,,Kanturinn" og víðar)

Miðbæjaríhaldið

[Þorleifur Ágústsson, 7.5.2007 kl. 12:47]

Sælir Allir góðir menn - þetta var nú skrifað í léttum tón sem andsvar við blogginu hans Nilla - sem er jú á Tálknafirði - ekki satt?

http://nilli.blog.is/blog/nilli/

Ekkert meira um það að segja - allt í léttum tón enda þýðir ekkert að þrefa við Nilla.

[Bjarni Kjartansson, 7.5.2007 kl. 14:09]

Akkurat Þorleifur.

Sumsé hann nilli minn verið að blása ögn út.

Um Níels Ársælsson er það að segja, að hann er vannýtt auðlind.  Hann er forkur duglegur sjósóknari, fylginn sér en seint verður hann talinn kurteis.

Hann hefur fengið kárínur af hendi ,,Kerfisins" svo oft að vart er tölu á þær komandi.

Ég man þegar hann gerði aðallega út frá Tálknó, voru Fiskistofumenn fastagestir á Hótelinu og virtust hafa það eitt að dunda, að haussetja Nilla.

Þeir synir Sæla, sem enn eru viðloðandi fiskveiðar eru hvor öðrum fisknari en Nilli sýnu hornóttari eftir langa glímu við Kerfi, sem lagt hefur hann nánast í einelti.

Hver dæmi fyrir sig og láti samvisku sína ráða, hvort þeir væru nú ekki orðnig pínu rætnir, eftir áralangat einelti heils sjávarútvegskerfi í öllum myndum þess, bæði LÍJúgararnir og allir hinir.

Miðbæjaríhaldið

Dæmir ei, þar sem því þykir afar vænt um duglegt fólk, raunar alinn upp við virðingu fyrir slíku fólki, hvors kynsins sem er.

[Þorleifur Ágústsson, 7.5.2007 kl. 14:55]

Auðvitað tek ég öllu þessu með stóískri ró - enda skil ég ósköp vel stöðu mála - það er auðvitað öllum ljóst. Og Nilli veit líka að þær rannsóknir sem við vinnum að hafa ekkert með pólítík að gera  - nema þá auðvitað þá pólítík að skapa grundvöll fyrir atvinnugrein - þessvegna blanda akademíu og iðnaðar.

kv, þorleifur.

[Ársæll Níelsson, 7.5.2007 kl. 16:48]

Bjarni.

Mig langaði bara rétt að koma föður mínum til varnar, þó hann hafi nú síst þörf á því að láta aðra gera það fyrir sig. En það er rangt hjá þér að kallinn verði seint talinn kurteis, því kurteisari og gestrisnari mann er erfitt að finna. Það er svo annað mál hvort hann geti stundum verið fljótfær eða jafnvel ögn spar á kurteisina finnist honum menn eiga hana skilið.

[Þorleifur Ágústsson, 7.5.2007 kl. 16:50]

sæll - ekkert mál - það sem ég t.d. benti Nilla á er að mjög margir lesa bloggin ykkar - miklu fleiri en t.d. mitt - og auðvitað hlustar fólk á hvað þið segið - menn sem mark er takandi á. Ég hef eytt miklum peningum í nám - fyrir utan þann tíma sem hefur farið í þetta-  vegna þess að ég hef áhuga á þessu - og eitt af því sem mér hefur verið uppálagt og ég reynt að temja mér er að vera vísindalegur - þ.e. láta ekkert hafa áhrif á mitt mat og meta rannsóknir út frá uppbyggingu - markmiðum og áherslum. Það reyni ég - og til þess er þetta gert - að meta hvort grundvöllur getur verið fyrir þessu öllu saman - og niðurstaðan getur auðvitað orðið sú að engin grundvöllur sé fyrir þorskeldi. En okkur ber skylda að skoða þann möguleika því þá yrði það raunhæfur kostur fyrir ALLAR byggðir í landinu og eins það að í þessum plássum býr gríðarleg þekking - þekking sem mig óraði ekki fyrir - með mér vinnur maður sem heitir Barði Ingibjartsson fyrrum skipstjóri á Bessanum - hann er snillingur. Alvöru maður sem treystandi er á. Og hann titlar sig ekki fræðing - og ég skammast mín ekki fyrir að segja það hreint út að án hans hefði þessi rannsókn ekki þolað íslensk vetrarveður - svo vel gekk hann frá öllu í kvíunum. Þetta vil ég virkja - þetta eru þeir sem geta gert þetta mögulegt og það í samspili með okkur vísindamönnunum. Ekki orð um það meira - hallelúja....kv, þorleifur.

[Ragnheiður , 7.5.2007 kl. 17:01]

Heldurðu nokkuð,minn kæri, að ég þurfi að smakka hvert kvikyndi ?  En fyrir þín orð skal ég prufa aftur