Kenningarnar og kerfið í góðu lagi - en fólkið brást!

Mikil er sú speki sem frá Valhöll kemur. Maður fellur nánast á kné og langar að ákalla sjálfstæðisguðinn.  Og niðurstaða mikill bollalegginga - höfðanna sem legið hafa í bleyti - að kerfið og kenningarnar séu í fínu lagi - en bansett mannskepnan brást.

Er þetta ekki einmitt vandamálið - við erum þau sem bjuggum til kenningarnar - settum leikreglur og smíðuðum kerfið. Svo að auðvitað brugðumst við. Fyrst var það kommúnisminn sem hrundi til grunna - gekk ekki - og þá hlakkaði í kapítalistunum sem vissu betur - þangað til að kerfið þeirra hrundi. En þá er það útskýrt með því að mannskepnurnar sem höfðu töglin og hagldirnar brugðust. 

Guðfaðirinn í Valhöll - sjálfur Davíðinn - hann brást. Fylgdi ekki eigin kenningum og leikreglum og því hrundi allt til grunna. 

Hvað er það sem gerir að við mannfólkið erum svo gjörsamlega laus við að geta á nokkurn hátt stundað sjálfsgagnrýni? Og að halda því fram að kenningar og kerfi virki - vitandi það að eina forsendan fyrir því er að við virkum - hvort sem við erum kommar eða kapítalistar. 

Ekki ósvipað og spurningin um hvort samkynhneigð gangi í erfðir? - og svarið við því er auðvitað það að samkynhneigð gengur ekki erfðir sé hún stunduð eingöngu!

Eins er það með kenningarnar - reglurnar og kerfið: Það gengur ekki upp nema að leikreglum sé fylgt - af einhug og vilja.

Athugasemdir

[Jón Steinar Ragnarsson, 2.3.2009 kl. 14:08]

Þú gleymir Pápískunni sem segir það sama til réttlætingar ransóknarréttunum, galdrafárinu og 600 ára tíð ofsókna fáfræði og myrkurs (raunar um 1500 ára ef allt er til talið)  Samt er allur viðbjóðurinn sóttur í ritninguna eins og Kommúnisminn, kapítalisminn og nú Globalisation vitfirringin. Allt hefur sína ritningu.

Þegar hugmyndafræðin er sett í fyrsta sæti og mannlegar þarfir og eðli í annað, þá hefur ætið farið svona. Á því er ekki að verða breyting. Ef hugmyndafræði brestur er það af því að hún er sett í forsætið og totalitarianisminn látinn ráða. Þá er ekkert svigrúm til aðlögunnar að breyttum tímum, mannlegum þörfum eða sjálfsgagnrýni.

Þess vegna er það hugmyndafræðinni að kenna er illa fer og  blindaðir ofstækismenn, sem firra sig mannlegu siðgæði málstaðnum til framdráttar eru aðeins verkfæri hennar. Þeir verða að lúta henni eða falla. Þú átt valið. Það er totalitarianismi holdi klæddur. Annað hvort þjónar þú og trúir og hlýtur vellystingar á himnum eða þú brennur í helvíti. No win, no win, kind of thing...

[Vilhjálmur Andri Kjartansson (IP-tala skráð) 2.3.2009 kl. 15:10]

Já það gleymist að maðurinn er ófullkoimnn skepna. Við viljum oft halda að svo sé ekki. Kreppur eru þess vegna óhjákvæmilegar á frjálsum markaði, við munum alltaf vera með offjárfestingu á einhverju sviði. Það sem kannski gerði þessa kreppu verri en aðrar er að maðurinn í krafti ríkisvalds víða um heim ætlaði að handstýra þessu með því að dæla ódýru féi inn á markaðinn í formi lágra vaxta, á sama tíma var enginn sparnaður til. Frekar heimskuleg hugmynd en manninum hefur svo sem dottið margt heimskulegra í hug.

[Kristlaug M Sigurðardóttir, 5.3.2009 kl. 01:03]

Þetta er að minnsta kosti það fyndnasta sem ég er að lesa í svefnleysinu:

"Ekki ósvipað og spurningin um hvort samkynhneigð gangi í erfðir? - og svarið við því er auðvitað það að samkynhneigð gengur ekki erfðir sé hún stunduð eingöngu!"