Aðstoðarmenn.

Fá stöðuheiti finnst mér flottari en "aðstoðarmaður". Einfaldlega af því að þau segja manni nákvæmlega ekki neitt.

En hvað gera aðstoðarmenn? Það sem mér finnst eitthvað svo skemmtilegt við þetta er að margir hverjir eru auðvitað ekkert til aðstoðar - eru etv. frekar til óþurftar - en eru kannski titlaðir aðstoðarmenn svona til að hafa stöðugildi - lýsa jafnvel ástandi - "hættu þessari afskiptasemi - þú ert ekki aðstoðarmaðurinn minn...." . Tja, kannski er ég heldur dómharður. Kannski erum við öll aðstoðarmenn.

En nú eftir kosningar þá hefur auðvitað umræðan um aðstoðarmenn verið ansi lífleg en aðstoðarmenn ráðherra eru jú þeir aðstoðarmenn sem mest eru í sviðsljósinu - sumir eru aðstoðarmenn af því að í þeim er fólgin aðstoð - aðrir eru aðstoðarmenn af pólitískum ástæðum og enn aðrir eru vinir eða vandamenn - og hver kannast ekki við aðstoðarmann forsætisráðherra Breta í þáttunum "little Britain" - svona hinsegin aðstoðarmaður.

Svo eru það auðvitað aðstoðarökumenn - þeir eru reyndar oftast nær "óumbeðnir aðstoðarmenn"- eru að eigin mati meira til "ráðlegginga" - en aðstoðarmenn engu að síður. Láta mann vita um leið og eitthvað ekki stemmir - hætta steðjar að eða bara til að láta mann vita - bara svona til öryggis... - svona bara til að maður viti að maður sé með aðstoðarmann. Ég er stundum með einn slíkan í framsætinu þegar ég er á ferðinni - engin nöfn nefnd auðvitað - en framhjá þeim aðstoðarmanni fara engin umferðaskilti eða merkingar án þess að mér sé á það bent....þetta má og þetta ekki...bara svona þér til aðstoðar og upplýsinga.

En flottasta aðstoðarmann hitti ég fyrir mörgum árum þegar ég skellti mér í gufubaðið á Hótel Loftleiðum - var eitthvað að þvælast fyrir sunnan og var grand á því - fékk mér hótel herbergi með mínibar og TV. En hvað um það. Ég sat þarna í gufubaðsklefanum í mestu makindum þegar inn kemur maður. Hann var auðvitað í "gufugalla" - allsber. Eftir skamma stund fór hann eitthvað að dytta að einhverju sem honum fannst ekki í lagi í klefanum - og mér auðvitað fannst það svona hálf undarlegt. "Starfar þú hér" spurði ég manninn undrandi? "já" segir hann. "Er ekki helvíti heitt að starfa svona í gufubaðsklefanum" spyr ég þá. "Nje, ég vinn ekkert í honum" segir þá maðurinn - "ég er að koma af vaktinni" bætir hann við. "Nú" segi ég - "við hvað starfar þú hér á hótelinu"?

 "Ég er aðstoðarmaður dyravarða" segir hann þá stoltur.

Já enn þann dag í dag get ég ekki gert mér grein fyrir því í hverju það starf felst. En titillinn hefur ákveðinn þunga.

Aðstoðarmaður dyravarða. Jahá.

Athugasemdir

[Hallgrímur Guðmundsson, 11.8.2007 kl. 01:55]

Hvað skildi vera langt þangað til að við heyrum um aðstoðarmann aðstoðarmannsins?
Bara smá pæling.
kv. Halli

[Ólafur Þórðarson, 11.8.2007 kl. 13:09]

Gaman að þessari pælingu

Mikið af þessum titlum er til að hylja minnimáttarkennd fólks, sem er að reyna að púkka sig upp og snapa betri og betri titil.

Ef þú ert í að ráða fólk, þá kemstu að því að það sem er flottast á ferilskrá er ekki endilega sá sem er gagnlegastur.

Svo eru aðstoðarmenn misjafnir. Sumir eru frábærir og skara langt fram úr þeim sem þeir "aðstoða" (gera vinnu þess sem þeir aðstoða) aðrir eru ráðnir með vanhugsuðum tilgangi, jafnvel upp á punt eða bara til að vera böffer fyrir yfirmann og raunveruleikans fyrir utan.

kv.