"Er í fríi frá vinnu í dag..vinsamlegast leitið annað...er að sinna strandveiðum"

Mér hefur fundist vera töluverð rómantík - svona andspyrnurómantík í kringum þessar strandveiðar. Barátta gegn stóru útgerðafélögunum.

 Ég sá fyrir mér að nú gætu þeir trillukarlar sem hafa viðurværi sitt af veiðum bætt við sig og fengið örlítinn aukaskammt. Já og jafnvel þeir sem ekki hafa haft ráð á að taka sér lán fyrir kvóta gætu fengið að draga sér fisk í soðið og nælt sér í smá aukapening. Svona vítamínsprauta fyrir byggðirnar í landinu.

Og svo gerist það að ég skrepp niður á bryggju í dag og hitti þar gamlan vin. Svolítill vottur af lífi er á höfninni og það er auðvitað vel. Karlar eru að landa og ég fylgist með.

En viti menn - þarna voru þá komnir allt aðrir menn en ég hélt að strandveiðin væri hugsuð fyrir. Þetta voru menn sem ég vissi ekki betur en væru í allt öðrum störfum - starfsmenn í bönkum og guð má vita hvar.....komnir úr jakkafötunum - búnir að taka sér frí og mættir um borð. 

Nú skildi ég þegar tölvupóstinum mínum til stofnunar í bænum var svarað með sjálfvirkri svörun "starfmaðurinn er ekki við í dag..vinsamlegast leitið annað" - já..starfsmaðurinn...hann var um borð að gera klárt fyrir næstu ferð!

Er þetta semsagt markmiðið með strandveiðunum? Að búa til aukapening fyrir þá sem hafa fasta atvinnu í öðrum greinum?

Ég verð að viðurkenna að mér fannst ljóminn fara af þessu og í reynd gera þetta að markleysu.

Ég spyr - er þetta sjómennska - atvinnugrein sem mun koma byggðunum til bjargar?

Athugasemdir

[Ingólfur H Þorleifsson, 18.5.2010 kl. 21:08]

Tolli þeir eru teljandi á fingrum annarar handar sem eru nýliðar í þessum strandveiðum. Þetta eru allt menn sem áttu annað hvort pening eftir að hafa selt kvótann og útgerðina eða héldu eftir bátunum og seldu kvótann. Ég skil þá menn hins vegar fullkomlega.

Þeim er fært á silfurfati réttur til að veiða fisk á ný vegna kosningaloforða misvitra stjórnmálamanna. Margir af þessum stjórnmálamönnum þ.m.t. formaður sjávarútvegsnefndar vissu ekki einu sinni hvað slægingarstuðull var þegar þeir voru farnir að makka um framtíð veiða við Ísland. Að við tölum nú ekki um varaformann sömu nefndar.

[Gunnar Heiðarsson, 18.5.2010 kl. 21:16]

Það er í sjálfu sér ekkert athugavert við að menn taki sér frí frá vinnu til að stunda svolitlar strandveiðar.

Verra er þegar menn sem hafa verið í smábátaútgerð, hafa átt kvóta og selt hann dýrum dómum en stunda veiðar eftir sem áður. Eða þeir sem hafa selt kvótann og fengið greitt frá ríkinu vegna úreldingar trillunnar sinnar, fá að skrá trillinuna aftur til veiða og stunda svo strandveiðar sem aldrei fyrr.

Fyrir hvern þessar veiðar eru hugsaðar veit ég ekki, en það getur varla verið eðlilegt að trillukarl geti selt kvóta frá bát sínum og fengið tugi miljóna fyrir, geti stundað veiðar áfram eins og ekkert hafi í skorist.

[Bjarni Kjartansson, 22.5.2010 kl. 12:49]

Þetta sýnir okkur bara hvað framsalið er arfavitlaust, það byggist allt á því að græða nógu helvíti mikið. Og þeir sem hafa varið þetta rugl í 20 ár ættu að líta sér nær, nú er þetta að komið í rassgatið á þeim. Þetta snýst ekkert um slægingarstuðul eð einhverjar persónur í sjávarútvegsnefnd eða árás á stórútgerð, það er bara pólitískur áróður, frekar snýst þetta um frelsi til athafna. Kannist þið ekki  eitthvað við það orðatiltæki sjálfstæðismenn? Eg hef verið skipstjóri á fiskiskipum í 37 ár og á þeim tíma hef eg haft í skiprúmi allskonar fólk, ekki mikið af því fólki hefur lagt fyrir sig sjómennsku. Mest voru þetta menn sem voru að fara í nám og voru að safna fyrir skólasetu, og eru margir af þeim  að vinna í embættismannakerfinu í dag og reyndar í öllu þjóðfélaginu, þetta á við um allan fiskiskipaflotan. Nokkrir þessara manna vildu vera á sjónum og fannst gaman að vinna við þessar aðstæður,en margir urðu að hætta af fjölskylduaðstæðum eða vegna veikinda. Þess vegna kemur mér það ekkert á óvart að sumir þessara manna noti tækifærið og skelli sér á sjóinn þegar færi gefst. Þótt það sé rétt rúmlega í matinn fyrir hundinn eða köttinn, hann er víst ekki svo ódýr sá matur, sem þeim er ætlaður, seldur  á okurverði í búðum. En eitt er víst að þessar trillur landa í heimabyggð til góðs fyrir hafnirnar og fólkið sem vinnur við fisk. Eruð þið á móti því sjálfstæðismenn?  Eg hef lent í þeirri stöðu að ná ekki í fólk í embættismannakerfinu, vegna þess að viðkomandi var á golfmóti eða á hestamannamóti, og það á örugglega við um fleiri en mig. Eg man ekki eftir því að einhver hafi skrifað um það.                        

[Níels A. Ársælsson., 24.5.2010 kl. 17:47]

Kom nú króníski sallinn upp í Golla.

Sagðist þú ekki vera hættur að blogga Golli ?

Tolli. Blessaður fáðu þér nú trillu og taktu þátt í þessu ævintýri með okkur.

En annars Tolli, hva hefur líffræðingur og skáld að gera með framleiðslu á hunda og kattamat ?