Kúlaður steinbítur

Fimmtudagur, 4. desember 2008

Tæknin heldur innreið sína hjá alþýðu landsins.

Nú eiga allir GSM síma - gemsa. Jafnvel krakkar. En einu sinni voru gemsar ekki til. Ekki einu sinni þráðlausir símar - eða hvað þá símsvarar.

En svo fékk pabbi sér símsvara - einn af þeim allra fyrstu. Stór og mikil græja með spólu sem tók upp samtöl - Alveg gjörsamlega sjálfvirkan!

Og þá hringdi afi - kannski vantaði hann heftiplástur fyrir skódann - hvur veit. Og símsvarinn svarar: "..þetta er sjálfvirkur símsvari hjá Ágústi dýralækni....hann er ekki við blablabla....". Og þá fyrtist sá gamli við og las símsvaranum pistilinn - sem auðvitað tók upp samtalið á spóluna - og sem pabbi spilaði þegar hann kom úr vitjun. Ekki ætla ég nú að hafa það eftir - en æstur var afi sem hundskammaði "pabba" fyrir "dónaskapinn". Afi sagðist vel þekkja röddina og hann skildi bara vita það að hann léti nú ekki bjóða sér svona viðtökur - og skellir á.

Svo hringir sá gamli aftur. Og enn svarar "pabbi" á sama "vélræna" hátt og kippir sér ekkert upp við skammir gamla mannsins - sem lýsir því yfir "að hann sé sko ekkert að hringja í hann og hafi í raun ekkert við hann að segja - hann hafi ætlað að tala við tengdadóttur sína og barnabörnin - og hana nú". Kom svo brunandi á skódanum heim til að ræða betur við soninn sem var með þessa stæla í símann - láta´nn fá gúmorren fyrir! Og viti menn - sama var hvað hann bankaði - enginn kom til dyra!?

Já tæknin kemur manni stundum í opna skjöldu. Verandi fæddur aldamótaárið 1900 - þá er kannski ekkert skrítið að gamli maðurinn skuli hafa æst sig yfir "dónaskap" sonarins!!

Flokkur: Bloggar | Facebook

Athugasemdir

Heyrðu! Nú skyndilega small allt saman! Ég hef lengi velt því fyrir mér hversu kunnuglegt þitt smetti var mér þegar ég sá þig fyrst hérna vestra. En svo kom það núna nýlega. Þú ert auðvitað bróðir hennar Birnu! Og Birna er besta vinkona Guðnýjar stjúpsystur minnar! Það hlaut að vera að þú værir frá Akureyri. Þaðan kemur nefnilega mestmegnis fólk eins og þú!